Bouhat dinon se main soch rahi hon ke humari zindgiyon mein Umeedein kya role ada karti hain, aisi Umeedein jo hum duniya se rakhte hain, wo jo hum jinhe chahte hain un se rakhte hain, ya wo jo humein chahte hai hum un se baand lete hain, kuch aisi umedein jo zindagi se hai, our kuch wo jo Allah se hoti hain…. Kaisi kaisi umeedon ke jaal hain humari zindagi mein? Kuch umeedein ke jinka hona laazmi hai is safar mein our kuch aisi ko dukh dard ke siwa kuch nahin deti…. phir bhi hum Umeedon ka sahaara lene par majboor hote rehte hain, kyon? Kya umeedein zindagi hai ya zindagi sang Umeedein hain… Kyon hum itna is cheez mein kho jate hain ke iske bina jeena dushwar ho jata sa lagne lagta hai?

Aisi Umeed jo Allah se hoti hai, jo apni zindagi se hoti hain wo to acchi hoti hain and in fact kaafi zaroori bhi hoti hain, kyonke ise hi to kehte hain “Umeed pe duniya Qaiyam hai”  Our yeh Umeed na ho to zindagi sach mein mushkil ho jati hai, har kathin haalaat mein yeh Umeed hi to kaam ati hai, Yeh Umeed hi to haath thaam kar nikaal le jati hai, our Insaan har tarha ke haal mein muskura kar jee jata hai, Umeed ki ungli pakarh kar barhe se barhe paharh ko bhi paar karte jata hai Allah pe Umeed uski zaat se Umeed, kyonke uski Zaat pe bhrosa rakhne wale, Us se acche ki Umeed rakhne wale bouhat khushnaseeb hote hain, kyonke haqeeqi raaz jaan jate hai ke aik wo hi zaat hai jo chahe to sab de de, har khwahish poori kar de,  our wohi hai jo chahe to sabkuch le le………

Kuch Umeedein hoti hain jo Insan khud se rakhta hai, and sach kahon to wo bhi bouhat zaroori hoti hain, kyonke unke bina Insan ko koi direction nahin milti zindagi mein, koi mazbooti nahin hoti iradon mein, Aisi umeedein bouhat pukhta strong hoti hain, khuloos se agar insan khud se umeed lagaye to use to kisi our ki zaroorat hi nahin rehti, aise hi jaise log doosron se wade karte hain and then unhe torh dete hain, kyonke wo khud se wada nahin karte, khud se kareinge to torha nahin jayega…complicated but yet simple baat na

Asal dukh deti hain wo Umeedein jo hum apne hi jaise kisi doose indiviual se doosre Insan se baandh lete hain, jorh lete hain, jis mein us doosre ka koi taaluq hi nahin hota, aisi umeedein jo hum apni tarf se us insan se mansoob kar lete hain, our phir unke poora na hone par hum doosre logon ko khatawaar kasoorwaar bewafa our jane kya kya therane lagte hain, ke wo “Humari” umeed pe poora nahin utre hehe,, bhala bataye koi ke wo kyonkar utarte poora “Humari” umeedon pe, kya unki apni umeedein nahin hai koi? Kya unki apni zindagi nahin hai koi, kya wo “humari” umeedein fulfill karne ko yahan aye hain hmmm, Jab insan khud apni khud se lagi umeedon ko itni mushkil se nibhata hai, to koi doosra bhala kaise nibha sakta hai :)) Haan mana duniya se nahin ke jinho se humse muhabbat ka dawa hi nahin kiya hota unse umeed rakna ke wo aise nahin kareinge ya kareinge yeh sirf nadani nahin bewaqoofi bhi hai, but humare aise humdam humsafar humare sathi,dost jo humein chahte hain our jinhe hum chahte hain, jin se humara wasta hota hai, jin se Mohabbat hoti hai our jinho ne Mohabbat ka ikrar kiya hota hai….Un se na chahte hue bhi ummedon ka aik taluq sa ho jata hai, our yeh koi itna bura nahin hai, lekin jab in Umeedon tawaqooat ki had “hadd” se bahir hone lage to kabhi kabhi barson ke rishte bouhat kamzoor parh jate hain, kyonke hum insanon se wo mangne lagte hain jo dene na dena to unke khtiyaar mein hi nahin hota, Wo hai ke “Admi Admi ko kya dega, jo bhi dega Khuda dega” to bas humein yeh sochna hoga ke jo hum apne samne wale se chah rahe hain kya wo  yeh sabkuch dene our fulfill karne ka ahel hai? Kya yeh uska farz hai ke wo humari in umeedon pe poora utre? ya yeh “humara” apna personal muamla hai ke hum apni umeedon ko limit mein rakhein…

Koi bhi insan doosre insan ko control nahin kar sakta, no way…. Control kar sakta hai to sirf khud ko apne aaap ko apni tamannaon ko, apni umeedon ko, apni zindagi ko, kisi bhi doosre insan ki zindagi ko, uski soch ko, uske amaal ko control our jaise khud chahe waise sanche mein dhalne ki koshish ya khwahish bhi karna aisa jaise hmmmm hawa ko qaid karne ki try karna ho Nothing is Impossible ull say, But trust me this isnt just Namumkin yeh insani kaam hi nahin…. agar farz karo koi ap se itna pyar karta hai ke apke liye khud ko apke saanjhe mein dhaal bhi le, apne aap ko apki har umeed pe poora nibha bhi le, yaqeen karein tab bhi hum kamiyaab nahin honge infact is se ziyaada nakaam zindagi kya hogi ke ap apne liye kisi doosre apne chahne wale ya jise ap chaho use badlo hmmmm, how unfair na…

Hum kaise yeh umeed kar lete hain, farz kar lete hain ke wo humein dhoka nahin dega, hum se bewafayi nahin karega, humara dil nahin torhega, humara sath nahin chorhega, humari har baat yaad rakhega, jaisa hum karte hain wo hum se wafa karega, mohabbat karega, hum gar UMEED lagane se ziyada DUA karein ke Allah aisa na ho to Bouhat hi sukoon mein raheinge, believe me! Kyonke Insan humesha se unfair hai, khudgarz hai, Allah justice karne wala hai, Wafaon ka sila bas wohi dene wala hai… simple!

And waise bhi thoda sa socha jaye to baat itni hi hai ke is se pehle ke hum is baat ka rona roye ke koi humari umeed pe, poora nahin utra, aya is se pehle ke hum yeh kahein “Mujhe tumse yeh Umeed na thi” humein apne andar dekhna hoga, kya hum unki umeed pe poora utar rahe hain? kehte hain ke doosron ki tarf ungli karna asaan hota hain, lekin at the same time unfortunately insan un three/3 unglion ko ignore kar raha hota hai jo “APNI” tarf hua karti hain :) Isliye mere khyal se aise mouqa hi nahin paida karna chahiye ke kisi se yeh kehne ka waqt aye “Mujhe tujhse aisi Umeed to na thi” hmmm, Umeedein lagani chahiye khud se, apni zindagi se, apne amaal se, Doosre insaan ke amaal uske kaam wo jane ya Allah jane, waise bhi har kisiko apne kiya ka milta hai, to bhal phir fikar kya…. Socha jaye to kaafi funny baat hai na, ke agar apni apni shop hai us pe bhi sabkuch hai jo samne wale ki shop pe hai, to kitna nadaan hoga na koi jo phir samne wale ki shop se wohi cheez lene jayega jo apni pe hai… matlab yeh ke Insan apne jaise hi Insan se Umeedein laga kar kuch nahin paa sakta

Umeedon ke hazar rang hote hain hazaar roop hote hain, har roop alag har andaz alag, bas khyal itna rakhna hoga ke hum in rangon mein khud ko kaise dhaal rahe hain, kahin aisa na ho ye in rangon ke rang itne gehre ho jayein ke humein asal tasweer nazar hi na haye, hum haqeeqat se door na ho jayein, and in english jise kehte hain Unrealistic expectations, unhealthy expectations ke shikaar hokar khud apne liye dard,dukh,our aik anokhi tanhayi ka samaan na collect kar rahe hon… and yeh sab *UMEED* ke naam par……..