Ramadan ka mahieena, barakaat ka maheena, Dua ka maheena, ataa ka maheena Rehmaton hi rehmaton ka maheena, aik aisa maheena ke jis mein main to kahongi jitna khudgarz ho sake utna ho jaye koi…Oh no no mera wo matlab nahin khudgarz se jo ap samajh rahe hain Mera matlab hai ke Allah se mangne ke muamle mein khudgarz ho jana chahiye, maghfirat mangni chahiye, jannat mangni chahiye, hidayat mangni chahiye, apne chahne walon ki salamti mangni chahiye, acchi seht, acchi soch, dil ka sukoon, ruh ka chain, our duniya our akhirat ki bhalayi mangni chahiye, in other words, Wo humara Rab hai hum uske bande hain, jo chahe maang lo…..Uske dar khule hai, wo sunne wala hai, wo sun raha hai, wo intezar mein hai ke koi mange our main usko ataa karon, wo raheem hai, wo kareem hain, wo rehmaan hai…

Hum insanon ka sare ka sare wujood pal pal gunah karta hai, hum soch bhi nahin sakte, andaza lagana chahein bhi to nahin laga sakte ke hum anjane mein kitne gunehgaar hain, apne wujood ko paak kar lene ka maheena hai, apne Malik apne Allah ke aage sar jhuka kar use our khud ko yeh batane our mehsoos karne karane ka maheena hai ke Ae Allah Tu humara parwadigaar hai hum tere gunehgaar bande, tujhse umeed hai tujhpe bharosa…

yon to har pal har lamha insan ko Allah ki yaad mein guzarna chahiye, us se darna chahiye, apne gunahon ki muafi mangni chahiye, ke hum jitne bhi parezgaar jitne bhi bhale musilm ban jayein, gunehgaar to hai hi, kyonke insaan hain Fariste nahin, our isiliye Farishton se insaan ko behtar kaha gya hai, ke hum insaan ghalti karein, muafi mangein our touba karein, seekhein our acche insaan bane, ke Fariston ko to jo kaha so wo karte hain, Insanon ko aqal ataa karke Allah ne aik aise Imtehaan mein dhaal diya ke jis ke kamiyaab our nakaam ka faisla roz-Mehshar hoga…

Lekin Ramadan ke mubarik maheene mein hum rehmatein lootne ka mukaam hain, apne Allah ke kareeb hone ka mukaam hai, apna ap paak o saaf kar lene ka mouqa hai… Hum jab kisise Mouhabbat karte hain wo har mumkin koshis karte hain ke apne mehboob ko khush kiya jaye, rakha jaye, uski har baat pe qurbaan jane ko jee chahta hai, dil chahta hai ke humara mehboob hum par fakhar kare, hum se khush rahe…wo hum se kuch farmaish kare our hum poori karne ko har mumkin koshish na karein yeh to ho hi nahin sakta! To… Kya hum Allah se Muhabbat ka dawa nahin karte? karte hain na…To apne Allah ko khush karne ki fikar mein hum kyon nahin? Kyon hum apne Allah ki mohabbat mein khud ko dhoobone se kho dene se itne khaufzada hain? Allah ke to hum par itne ehsanaat hain, kyon hum itne beqadar ho gaye hain ke bhool jate hain….humara dil, dimagh, ruh sab uski hi to amanat hai :))))

Meri dua hai, Ke Ae Allah wo us din jab sare hisaab honge, jab koi bachane wala nahin hoga, na maa na baap, na behn na bhai, na husband na biwi, Na dost na rishtedaar, jab hum honge our humare amaal honge, our jab humari zindagi aik film aik movie ki tarha humari nazron ke aage chalayi jayegi dikhayi jayegi, Ae Allah us pal humein sharmindagi se bachana, humare nazar sharm se jhuke nahin, apni rehmat se humein wo rah dikha de ke jis pe chal ke hum teri qurbat hasil kar sakein, Ameen sum Ameen :)))

Ramadan mubarak to each and every muslim, Be blessed :))