Posheeda hai……

Aurat ki haya…Uski Fitrat mein!

Aurat ki wafa…Uske Khuloos mein!

Aurat ki himmat…Uske Sabr mein!

Aurat ki adaa…Uski chaal mein!

Aurat ki izzat…Uski Aabroo mein!

Aurat ki taqat…Uske Azm mein!

Aurat ki sharafat…Uske Jazbaat mein!

Aurat ka husan…Uske Aanso’on mein!

Aurat ki khushi…Uski Chahat mein!

Aurat ki Azmat…Uske Waqaar mein!

Kya hi khoob likha hai jis ne bhi likha hai yeh sab, our kitna hi sach hai hmmm, Aurat ko Allah mian ne kya hi pyara banaya, lekin afsoos aajkal aurat ne khud apne aap ko kitna hi sasta our bemaya bana liya hai, apni taqt apni himmat apne hi wujood ko khud apne haaton sasta kar diya hai, Haan lekin abhi bhi is duniya mein aisi aurat hai jisne apne aap ko salamt rakha hai Alhamdulillah our Allah unhe taqt diye rakhe ke wo khud ko usi mukaam par ta’Qayamt qaim rakh sakein, kyonke aik aurat ka mukaam to bouhat uncha hai, our yeh samjhne keliye use apne anadar ki aurat ko jagana hoga our jagaye rakhna hoga, taa’ke wo darbadar hone se bach sake, our jis pe is duniya ka har fard our khaas kar aik aurat fakhr kar sake……..

Allah na kare ke aik aurat khud aik aurat kehlane se sharmida ho, our use khud ko chupana parhe kisi doosre ke amaal ki wajah se, Yeh humara muashra hai hi kuch aisa, ke karta koi hai bharta koi hai, haan magar wo aik zaat hai upar jo humesha insaaf karti hai hmmm… shaiyad humari duayein is duniya ke urhti hui haya ko badal dein but wo kehte hain na dua ke sath dawaa bhi laazmi hoti hai.. Main kabhi kabhi sochti hon ke aik aurat apne mukaam ko itne neeche kyon le ati hai our phir khud hi rona roti hai ke use uske mukaam se mehroom kar diya gya hai, kya usne kabhi socha hai aisa kyon hai? Main yeh nahin keh rahi ke nikaab pehn kar chaar deewati mein betha jaye, haan magar main itna zaroor samjhti hon ke kabhi kabhi har aurat ko khud ko aeene mein dekhne ki zaroorat hai, our khud se nazrein mila kar poochne ki zaroorat hai ke kya yehi wo rasta hai jis pe chal kar main surharoo ho sakti hon, jis pe chalne se mujhe us zaat ke aage sharmindagi nahin hogi ke jisne mujhpe itna aitmaad kiya ke aane wali naslon ki pehli dars-gaaah mujhe tehra diya, mujhe itna maan diya ke mere bina qainaat aage chal hi nahin sakti? Uss zaat ke is aitmaad our aitbaar ka kya sila diya jaa raha hai….Sochna chaiye, tab nahin jab waqt ho coz wo to is masroof duniya ki bheerh mein milega nahin hmm waqt khud nikaal kar socho our samjho………

Maine kahin parha tha ke Aurat ka koi ghar nahin, siwa kabar ke hmmm, coz jab aurat beti hoti hai to wo ghar baap ka hota hai, jab Biwi banti hai to wo ghar shouhar ka hota hai our uske baad maa banti hai to wo ghar bete na hota hai hmmm, lekin jane kyon mujhe is baat ne sochne par majboor kar diya ke dekha jaye to yeh sabhi ghar aurat ke hi to hote hain, bas mehsoos karne our samjhne ki baat hai, baap ke ghar ki wo raani hot hai, khud ko raani ki tarha rakhe our amal kare to, Apne shouhar ke ghar ki wo Malika hoti hai, shart yeh hai ke shouhar ko ghar ke badsha ke mukaam par rakhe to, apne beton apni aulaad ke ghat ki wo rehmat hoti hai, ghani chaoon hoti hai jo wo apne is mukaam se justice kare to…. Kya yeh zaroori hai ke aurat hukmarani hi chahe? nahin hargiz nahin… gharoor ne aik farishte ko shaitan bana diya, yeh to phir aurat hai…. Apni muhabbat, apne khuloos se apna mukaam barkarar rakhne ka hunar Allah ne har aurat mein fitratan dhaal diya hua hai, ab yeh aurat par hai ke wo kis had tak use istimal kari hai, our apni zindagi ko kaha le kar jaati hai… wo shair hai na… “Amal se zindagi banti hai, Jannat bhi jahanum bhi” ………… Apne andar ki posheeda aurat ko jagane mein abhi bhi dair nahin hui, apna asal mukaam pehchan’ne ka waqt abhi bhi baaki hai, is se pehle ke dair ho jaye, our  is daldal mein aurat apna sabkuch ganwa de, jaaag jana chaiye….. :))