Mohabbat ka yeh naam Mohabbat ada karte hue humare lab do baar aik doosre ko choomte hain, Koshish karke dekh le koi…MohaBBat…Koi keh hi nahin sakta yeh naam bina iske ke unke hont do baar aik doosre se milein na Kitni pyari hai yeh cheez,Lekin kya yeh koi cheez hain, kya yeh koi zaat hai, kya yeh koi jazba hai, Mohabbat akhir hai kya? Main samajhti hon kam se kam main to kabhi bhi mukamil tarha se nahin bata paon gi Mohabbat kya hai, Mohabbat to bas hawa mein hai, sanson mein basera hai iska, dhadhkanon mein rachi hoti hai, Khushbu ki tarha mehakti hain, muskurahaton ki tarha khilkhilati hai, Ansooon ki tarha shafaf hoti hai, Mohabbat pakizgi hai mann ki, milap hai do dilon ka do ruhon ka, Mohabbat aik asmaani ehsas hai, Khubsurat se bhi Khubsurat bandhan…

Yon to Mohabbat bouhat se roop mein hoti hai, Maa baap se, aulaad se, behan bahiyon ki Mohabbat, Mian biwi ki Mohabbat, Lekin mera jis Mohabbat ke baare baat karne ko dil chah raha hai wo do dilon ki do ruhon ki ai kdoosre se Mohabbat hai, Bina kisi milawat ke bina kisi banawat ke, Bas Mohabbat ho, sirf Mohabbat Sacch mano bouhat hi pyara ehsas hai yeh Mohabbat ka, Jab aik dil doosre dil se ko dil se chahne lage, uski fikar karne lage, use pyar karne lage, us se Mohabbat karne lage, Zindagi phir jannat se kam to nahin hoti, sukoon our chain se bharpoor, bas wafa hi wafa, aik doosre ke liye dua hi dua….

Mohabbat mein yeh baat to hoti hi nahin ke kya paya our kya khoya, Mohabbat to bas apna aap, apni chahat apni wafa lootaye our nichawar kiye jane ka naam hai, pana our khona to karobaar ho gya na, ke itne nuksaan hai itna faida, yeh koi Mohabbat hui, yeh to mukamil Mohabbat ki toheen ho gayi, jo Mohabbat kabhi gawara nahin karti, yeh to aise paak our mukhlis hai ke iske dam se duniya qaim, yehi to wo Mohabbat hai ke jo wajah bani wasila bani ke Allah ne Qainaat ko banaya, phir is mein yeh sara mela sajaya :)… Jab kisi se Mohabbat ho jati hai, wo Mohabbat jiska main zikar kar rahi hon, jis mein na dhoka hota hai na milawat, aisi Mohabbat jab ho jaati hai to phir sirf ehsas hota hai, us insan ka, uski zaat ka, insan us par khud us se ziyada mehrubaan ho jata hai, ke uski khushi our uski muskaan ke aage kuch nahin hota, bas uski chahat hoti hai to rag rag mein lahoo ki tarha gardish karti hai, Uski aik jhalak ka intezaar rehta hain, Uski salamti ki duayein hoti hai our bas….

Allah mian jan do dilon mein aik doosre ke liye Mohabbat dhaal deta hai, to kisi cheez ki phir tamanna nahin rehti, Aik tadap hoti hai jo mann mein rehti hain, aik aas hoti hai jo ruh ko mehkaye rakhti hai, Jab aik baar dil sacche dil se jurh jate hain to phir kabhi juda nahin hote, kyonke wo phir do nahin rehte, chahe insan paas rahe door rahe, jahan bhi rahe Do dil pal pal kareeb hi hote hain, our aik doosre ki dhadhkanon ke ta’aluq se rabta rakhe hote hain, bin bole aik doosre ka haal jaan jate hain, Kabhi ankhon se to kabhi saanson ki hulchal se….

Mohabbat ki tarf jab kadam barahye jate hain to wapsi ke sab raste bhula diye jate hain, Is samundar mein jab dhooba jata hai, to loat jane ki saari kashtiyan jala di jati hain sath sath, wo bhi khushi se, our lagan se, Mohabbat ki koi miraaj nahin, na koi sharat hai, yeh to bas sada se hoti hai our sada tak rehti hai, is mein soudagiri nahin ki jati ke yeh hua yeh kiya to Mohabbat ke hum humsafar hain, aisa nahin hua to wo rasta tumhara wo humara…yeh hota hoga waha jahan Mohabbat ke naam ko bas istemaal kiya jata hai, aik fashion ki tarha, bas kuch karna hai to chalo Mohabbat karte hain..waha..Lekin Nahin aisa us Mohabbat ka shewa nahin jiski main aaj baat kar rahi hon

Mohabbat mein Mehboob ki khubiyon sath sab khamiyan bhi kubool hoti hain, kuch log kehte hain.. maine khud suna hai parha hai ke Mohabbat hoti hai to khamiya nazar nahin ati, well main is baat se ittefaq nahin karti, kyonki mere khyal se Khaamiya nazar ati hain our acchi tarha maloom bhi hoti hain lekin jis Insan se Mohabbat hoti hai jo Dil ka humdam baya jata hai usko uski khubiyon our khamiyon samet mukamil tarha se qubool kiya jata hai, yeh jante hue ke wo insan hai our insan kabhi bhi farishte na hue hain na ho sakte hain, wo insan hai gunehgaar bhi masoom bhi… Har khami har kami se paak to Allah hai ya Farishte hain ya phir MohaBBat hai

kabhi kabhi sunne mein yeh bhi ata hai ke Mohabbat apni duniya ki baasi hai, jab yeh dilon mein basera karta hai to insan apni aik alag duniya basa leta hai, aisa jane kyon kaha jata hai Main to samjhti hon Mohabbat jeena seekhati hai, duniya ke sang sang chalna sikhlati hai, har wo hunar sikhati hai to our koi na samjha sakta hai na bata sakta hai, Mohabbat wo raaz faash karti hai zindagi ke jinhe mehsoos karke insan khairaan reh jata hai, ke yeh kaisi ustaad hai ke dheere dheere kaise chupke se sabkuch samjha jati hai…

Mohabbat ka har kadam manzil hai, Intezaar bhi manzil, millan bhi manzil judayi bhi manzil.. kadam kadam aik safar, kadam kadam aik manzil Jinhe intezaar mein lutf nahin unhe millan ka maza bhi mehsoos na hoga, wo bas millan ki us manzil pe pohanch kar thakwat ke siwa kuch na mehsoos kar payeinge, Muskurate hue Mohabbat ka har dard sehna, har tadap pe nisaar hona, har muskurahat ko khushamdeed kehna, yeh sab hi Mohabbat ha haq hai…

Mohabbat do ruhon ka khubsurat sa millan hai, jo samjhaya nahin jata, bas Khuda ki ataa hai, uski dain hai wo jise bhi is se nawaz de, yeh wo jazba hai jo wohi jaan sakta hai ke jiske Dil ne sacche Dil se sacche tann se sacche mann se our poori imandaari se kisi Dil se Mohabbat ki ho Maine ki hai Mohabbat aisi, maine payi hai Mohabbat aise, meri duas hai har koi is Mohabbat se Aashna ho, our Allah meri Mohabbat our mere Mehboob ko sada salamt rakhe, Mohabbat mein sirf milne ki hi dua nahin mangni chaiye, Mohabbat ki salamti ki dua bhi utna hi zaroori hai… So isliye meri Iltija hai Mohabbat ke naam ko badnaam karne se pehle hazaar baar socho our phir dubarao socho, ke Mohabbat ki Ahh bouhat unchayi pe jaati hai, our phir bouhat gehrayi mein le jayegi…..